बागमती प्रदेशका मुख्यमन्त्री ईन्द्रबहादुर बानियाँले पदबाट राजीनामा दिएका छन्।सोमबार दिउँसो बसेको बागमती प्रदेशसभा बैठकलाई सम्बोधन गर्दै उनले पदबाट राजीनामा दिने घोषणा गरेका हुन् ।
सरकारमा सहभागी नेकपा एमालेले ६ साउनमा सरकारलाई दिएको समर्थन फिर्ता लिएसँगै मुख्यमन्त्री बानियाँ अल्पमतमा परेका थिए । उनले आजै विश्वासको मत लिने तयारी गरिरहेका थिए । बागमती प्रदेश सभामा कांग्रेस ३६ सिटसहित सबैभन्दा ठूलो दल छ । नेकपाको २६ सिट र एमालेको २५ सिट र अन्य राप्रपाको १२, नेमकिपाको तीन र हाम्रो नेपाली पार्टीको दुई सिट छ । बागमतीमा नयाँ सरकार गठनका लागि ५३ जना प्रदेश सभा सदस्यको बहुमत पुर्याउनुपर्ने अवस्था छ । मुख्यमन्त्री बानियाँले बहुमत जुटाउने कोसिस पनि गरेका थिए। तर बहुमत जुटाउन नसकेपछि उनी राजीनामा दिएका हुन ।
बिज्ञापन
प्रदेश सभा बैठकको रोस्ट्रमबाट राजीनामा घोषणा गरेका बानियाँले लगत्तै प्रदेश प्रमुखलाई भेटेर राजीनामा पत्र बुझाउने बताएका थिए। उनले नेकपा एमाले र नेकपालाई बहुमत जुटाएर सरकार बनाउन आग्रह गरेका छन्। यहाँ एमाले र नेकपालाई नयाँ सरकार बनाउन २ जना सांसदको आवश्यक्ता पर्नेछ । सो प्रदेशमा १०४ सदस्यीय प्रदेशसभामा सदस्यहरु रहेका छन् । नेकपा र एमालेको गठबन्धन गर्दा ५१ जना मात्र पुग्छ ।
